ტრენინგი “სახელმწიფო შესყიდვების კურსი“ საქართველოს საჯარო სკოლების, სახელმწიფო უწყებების და ადგილობრივი თვითმმართველობის ორგანოების შესყიდვების სპეციალისტებისათვის

2017 წლის 11 სექტემბრიდან 22 სექტემბერის ჩათვლით, სახელმწიფო შესყიდვების სააგენტოს ორგანიზებითა და დაფინანსებით, ამავე უწყების სასწავლო ცენტრში, ჩატარდება ტრენინგები „სახელმწიფო შესყიდვების კურსი“, საქართველოს საჯარო სკოლების, სახელმწიფო უწყებების და ადგილობრივი თვითმმართველობის ორგანოების შესყიდვების კუთხით დასაქმებული სპეციალისტებისათვის.

ტრენინგს გაუძღვებიან სახელმწიფო შესყიდვების სააგენტოს მაღალკვალიფიციური თანამშრომლები, სწავლების მრავალწლიანი გამოცდილებით.

დაინტერესებულ პირებს ვთხოვთ გაიარონ რეგისტრაცია:

http://www.procurement.gov.ge/TrainingCenter/training/registration.aspx“

დამატებითი ინფორმაციისთვის დაგვიკავშირდით:

ტელ: 577 24 44 28 ნინო ჭავჭავაძე
ელ.ფოსტა: training.center@spa.ge

შესყიდვების სააგენტომ შესყიდვის ობიექტის ანალოგიური მიწოდების მოთხოვნასთან დაკავშირებით რეკომენდაციები შეიმუშავა

სახელმწიფო შესყიდვების სააგენტომ შეიმუშავა და ოფიციალურ ვებგვერდზე (http://procurement.gov.ge/) განათავსა ახალი რეკომენდაცია, რომელიც ეხება ანალოგიურ შესრულებასთან/მიწოდებასთან დაკავშირებულ მოთხოვნებს.

საგულისხმოა, რომ ტექნიკური ცოდნის/გამოცდილების შეფასების მიზნით განსაზღვრული მოთხოვნები, ცალკეულ შემთხვევებში, ჩამოყალიბებულია შესყიდვის ობიექტთან მიმართებით არაპროპორციულად, ბუნდოვნად ან/და ორაზროვნად, რაც წარმოქმნის არა მხოლოდ სადავო საკითხებს და აჭიანურებს შესყიდვის პროცედურებს, არამედ წარმოადგენს ხელისშემშლელ ფაქტორს სახელმწიფო ტენდერებში მონაწილეობისას. გარდა ზემოაღნიშნულისა, ზოგიერთ შემთხვევებში, შემსყიდველი ორგანიზაციები სატენდერო წინადადებების დაზუსტების ეტაპზე აყალიბებენ თვისობრივად ახალ პირობას, რაც იწვევს საფუძვლიან უკმაყოფილებას მიმწოდებლების მხრიდან და, შესაბამისად, დამატებით დროს დავების განხილვის საბჭოში გადაწყვეტილების მისაღებად.

სააგენტოს მიერ შემუშავებულ რეკომენდაციაში, ერთის მხრივ, მოყვანილია სახელმწიფო შესყიდვებთან დაკავშირებულ დავების განხილვის საბჭოში წარდგენილი ტიპიური საჩივრები, ხოლო, მეორეს მხრივ, გაშუქებულია სწორი პრაქტიკა, რაც დაეხმარება შემსყიდველ ორგანიზაციებს ობიექტური მოთხოვნების ჩამოყალიბებაში და ხელს შეუწყობს არა მხოლოდ სადავო საკითხებისა და საჩივრების შემცირებას, არამედ სახელმწიფო ტენდერებში მაღალი კონკურენციის მიღწევას.

შესყიდვის ობიექტის ანალოგიური მიწოდების მოთხოვნასთან დაკავშირებული რეკომენდაციები განთავსებულია სახელმწიფო შესყიდვების სააგენტოს ვებ-გვერდზე, რუბრიკაში „მეთოდური მითითებები და რეკომენდაციები“.

ელექტრონული ტენდერის ჩატარების ახალი წესი ძალაში შევიდა

2017 წლის 19 ივლისიდან ელექტრონული ტენდერის ჩატარების ახალი წესი ძალაში შევიდა.

„სახელმწიფო შესყიდვების შესახებ“ საქართველოს კანონში ცვლილების შეტანის თაობაზე“ საქართველოს 2017 წლის 6 აპრილის №617 კანონის მე-2 მუხლით სახელმწიფო შესყიდვების სააგენტოს დაევალა, ამ კანონის ამოქმედებიდან არაუგვიანეს 60 დღისა, უზრუნველეყო კანონქვემდებარე ნორმატიული აქტების მასთან შესაბამისობა.

კანონით დაკისრებული ზემოაღნიშნული დავალების შესასრულებლად, გამოიცა სახელმწიფო შესყიდვების სააგენტოს თავმჯდომარის №12 ბრძანება „ელექტრონული ტენდერის ჩატარების წესის დამტკიცების შესახებ“ (შემდგომში – ელექტრონული ტენდერის ჩატარების წესი), რომელიც საქართველოს საკანონმდებლო მაცნეს ვებგვერდზე www.matsne.gov.ge გამოქვეყნდა 2017 წლის 15 ივნისს.

ელექტრონული ტენდერის ჩატარების ახალი წესით, ერთი მხრივ, აღსრულდა კანონისმიერი მოთხოვნა, ხოლო, მეორე მხრივ, დეტალურად და მკაფიოდ ჩამოყალიბდა ელექტრონული ტენდერის მარეგულირებელი ნორმები.

ელექტრონული ტენდერის ჩატარების ახალი წესი შედგება 6 თავისგან, 40 მუხლისგან და 3 დანართისგან. მისი ამგვარი სტრუქტურა უზრუნველყოფს ნორმების განაწილებას ქრონოლოგიურად და მარტივს ხდის ტენდერის ამა თუ იმ ეტაპის აღქმის შესაძლებლობას. სახელდობრ, ცვლილებები შეეხო შემდეგ საკითხებს: განისაზღვრა ელექტრონული ტენდერის ჩატარების პრინციპები, დაიხვეწა ტერმინოლოგია, დეტალურად გაიწერა სატენდერო კომისიის მიერ გადაწყვეტილების მიღების პროცესი, პრეტენდენტისადმი მოთხოვნების დადგენის წესი, პრეტენდენტთა შეფასებისა და გამარჯვებული პრეტენდენტის გამოვლენის პროცედურები, გასწორდა აფიდავიტის პირობები და ისინი დაუკავშირდა მხოლოდ ხელშეკრულების დადების უფლების მოპოვების მიზნით არაკეთილსინდისიერი ქმედების ჩადენას. ელექტრონული ტენდერის ჩატარების ახალი წესით დაცულია ბალანსი შემსყიდველი ორგანიზაციისა და მიმწოდებლების უფლებებსა და ინტერესებს შორის.

ახალი წესის ამოქმედებამდე (2017 წლის 19 ივლისამდე) გამოცხადებული გამარტივებული ელექტრონული და ელექტრონული ტენდერები ჩატარდება „გამარტივებული ელექტრონული ტენდერისა და ელექტრონული ტენდერის ჩატარების წესის დამტკიცების შესახებ“ სახელმწიფო შესყიდვების სააგენტოს თავმჯდომარის 2011 წლის 7 აპრილის №9 ბრძანების შესაბამისად.