შემსყიდველი ორგანიზაციების საყურადღებოდ!

შეგახსენებთ, რომ საქართველოს მთავრობის 2018 წლის 29 აგვისტოს №446 დადგენილების გათვალისწინებით სახელმწიფო შესყიდვების სააგენტო გეგმავს კონსოლიდირებული ტენდერების გამოცხადებას, გთხოვთ ქვემოთ ჩამოთვლილ შესყიდვის ობიექტებზე მოგვაწოდოთ შესაბამისი ინფორმაცია.
ავტოდაზღვევის 2019 წლის კონსოლიდირებული ტენდერის ფარგლებში, დასაზღვევი სატრანსპორტო საშუალებების საბალანსო ღირებულებების თაობაზე; (ბმული)
მცირე ტვირთამწეობის საბურავები - არაუგვიანეს 12 ნოემბრისა; (ბმული)
ნავთობპროდუქცია (საწვავი) - არაუგვიანეს 14 ნოემბრისა; (ბმული)
A4 ფორმატის საბეჭდი ქაღალდი - არაუგვიანეს 14 ნოემბრისა; (ბმული)

(დეტალური ინფორმაციისათვის მიყევით ბმულებს)

კონსოლიდირებული ტენდერების ჩატარებასთან დაკავშირებული ზოგიერთი ღონისძიების შესახებ

შეგახსენებთ, რომ 2019 წლისთვის საჭირო იმ საქონელისა და მომსახურების შესყიდვა, რომელიც ექცევა საქართველოს მთავრობის 2018 წლის 29 აგვისტოს №446 დადგენილების დანართით გათვალისწინებულ ჩამონათვალში უნდა განხორციელდეს სახელმწიფო შესყიდვების სააგენტოსთან შეთანხმებით, აღნიშნული შეთანხმების მიღწევა შესაძლებელია ელექტრონული ფოსტის con@spa.gov.ge მეშვეობით.

შესაბამის მომართვას თან უნდა ერთვოდეს შესყიდვის ობიექტის დასახელება, CPV-კოდი, პროდუქტის ან/და მომსახურების მიწოდების ვადები და სავარაუდო ღირებულება.

სახელმწიფო შესყიდვების ერთიანი ელექტრონული სისტემის მომხმარებელთა საყურადღებოდ!

გაცნობებთ, რომ საქართველოს მთავრობის 2018 წლის 2 ივლისის №1327 განკარგულებით, 2018 წლის 1 ივლისიდან 2019 წლის 1 იანვრამდე სახელმწიფო შესყიდვების ერთიანი ელექტრონული სისტემის მომხმარებლები (შემსყიდველი ორგანიზაციები და შესყიდვებში მონაწილეობის მსურველები/პრეტენდენტები/მიმწოდებლები) ამავე სისტემაში ელექტრონული დოკუმენტების ატვირთვისას გათავისუფლდნენ „ელექტრონული დოკუმენტისა და ელექტრონული სანდო მომსახურების შესახებ“ საქართველოს კანონის მე-3 მუხლის მე-3 და მე-4 პუნქტებით გათვალისწინებული ვალდებულებებისგან.

ამდენად, 2018 წლის 1 ივლისიდან 2019 წლის 1 იანვრამდე შემსყიდველი ორგანიზაციები და შესყიდვებში მონაწილეობის მსურველები/პრეტენდენტები/მიმწოდებლები აღარ არიან ვალდებულები, სახელმწიფო შესყიდვებში ერთიან ელექტრონულ სისტემაში ასატვირთ ელექტრონულ დოკუმენტებზე შეასრულონ კვალიფიციური ელექტრონული ხელმოწერა ან/და ეს დოკუმენტები დაამოწმონ კვალიფიციური ელექტრონული შტამპით.

მიუხედავად ზემოაღნიშნულისა, სააგენტო განმარტავს, რომ შემსყიდველი ორგანიზაციები და შესყიდვებში მონაწილეობის მსურველები/პრეტენდენტები/მიმწოდებლები უფლებამოსილი არიან, ელექტრონულ დოკუმენტზე შეასრულონ კვალიფიციური ელექტრონული ხელმოწერა ან/და გამოიყენონ კვალიფიციური ელექტრონული შტამპი. აღნიშნული წესით შესრულებული დოკუმენტი იურიდიული ძალის მქონეა. ასეთ შემთხვევაში, შემსყიდველ ორგანიზაციას არ აქვს უფლება, შესყიდვებში მონაწილეობის მსურველს/პრეტენდენტს/მიმწოდებელს მოსთხოვოს მატერიალურად ხელმოწერილი/დამოწმებული დოკუმენტი.

ამასთან, ელექტრონული დოკუმენტბრუნვის ხელშეწყობის მიზნით, სააგენტო მოუწოდებს შემსყიდველ ორგანიზაციებსა და შესყიდვებში მონაწილეობის მსურველებს/პრეტენდენტებს/მიმწოდებლებს, გაატარონ სათანადო მოსამზადებელი ღონისძიებები, რათა 2019 წლის 1 იანვრიდან უზრუნველყონ „ელექტრონული დოკუმენტისა და ელექტრონული სანდო მომსახურების შესახებ“ საქართველოს კანონის მოთხოვნათა განუხრელი დაცვა.